ندخل على المطبخ الهندي المليان بالتوابل و الروايح الحلوة ، هقدملكم برياني الفراخ الهندي بطريقته الاصلية و توابله المظبوطة ، تابعو معايا ..
برياني الفراخ الهندي :
المكونات :
- فرخة كاملة توزن كيلو مقطعة
- اربع اكواب من الارز البسمتي مسلوق
- اربع ملاعق كبيرة اوراق نعناع مفروم
- معلقة صغيرة جرام ماسالا بودرة
- رشة من الملح
- رشة من الزعفران
- ملعقتان صغيرتان كزبرة ناعمة
- ملعقة كبيرة زنجبيل مفروم
- ملعقة كبيرة ثوم مفروم
- ثمرة فلفل حار مقطعة
- ملعقتان كبيرتان معجون طماطم
- ربع كيلو من الطماطم مفروم
- نصف كيلو بصل ابيض شرائح
- ملعقتان صغيرتان كمون حب
- ثمانية حبات حبهان
- ست ملاعق كبيرة زيت
- نصف ملعقة صغيرة شطة
- ملعقة صغيرة كركم بودرة
- ست ملاعق كبيرة زبادي
- ملعقة كبيرة لبن
طريقة برياني الفراخ الهندي ببساطة :
- الاول نغسل الفرخة كويس جدا بالمياه و الخل و الدقيق من كل الجوانب و نشطفها بالمياه بس و نحطها في مصفاه .
- نحط قطع الفرخة في بولة كبيرة و نحط عليها الزبادي و الكركم مع الشطة و نقلب كويس مع بعض و نسيبها تتبل لمدة نص ساعة تقريبا .
- ندوب الزعفران في اللبن و نسيبهم على جنب .
- في طاسة كبيرة نسخن الزيت على نار متوسطة الحرارة و نشوح فيها الحبهان و الكمون الحب لمدة دقيقتين بس .
- نحط شرايح البصل في الطاسة و نقلب كويس لغاية ما تدبل و تصفر و بعدين النحط الثوم و نقلب كويس ، و نحط الطماطم المفرومة و معجون الطماطم و نسيبها على النار خمس دقايق .
- نحط على البصل الفلفل الحار مع الزنجبيل و نقلب لمدة دقيقة على نار هادية و نحط في الاخر الفراخ و نقلب لغاية ما تنزل عصارتها و نعلي الحرارة دقيقتين او تلاتة ، و نغطي الطاسة و نسيبها خمس دقايق تستوي تماما ، و ممكن نزود شوية مياه مغلية تكمل سواها
- نقلب خليط اللبن و الزعفران مع الجرام ماسالا مع النعناع و الكزبرة كويس جدا .
- في حلة نحط نص كمية الارز المسلوق و عليها خليط الفراخ و عليه باقي كمية الارز ، و نصب فوقهم خليط اللبن و الزعفران بالتساوي .
- نغطي الحلة و نحطها على نار هادية لمدة خمس دقايق و بعدين نشيل الغطاء و نسيبها على النار لمدة 10 دقايق و هيكون جاهز للتقديم ساخن .
بالهنا ..
