كرات الجبنة المنفوخة الفرنسية

عايزين طبق مقبلات لذيذ و مختلف و كمان شكلها مختلف جدا ، تعالوا اعرفوا معايا وصفة كرات الجبنة المنفوخة الفرنسية الشهية ..

كرات الجبنة المنفوخة الفرنسية :

المقادير :

  • كوب دقيق لكل الانواع
  • نص ملعقة صغيرة ملح
  • نص ملعقة صغيرة فلفل اسود ناعم
  • نص ملعقة صغيرة زعتر ناشف
  • نص ملعقة صغيرة شطة
  • قطعة فلفل حار صغيرة مفرومة
  • كوب لبن كامل الدسم
  • اصبع من الزبدة
  • 6 حبات بيض كبيرة
  • نص كوب جبنة باميزان او رومي مبشورة
  •كوب الا ربع جبنة غوريير او شيدر او جودة مبشورة
  • كوب بيبروني مقطع "اختياري"
  • ملعقتان كبيرتان لبن
  • ملعقتان كبيرتان باميزان مبشورة

طريقة كرات الجبنة المنفوخة الفرنسية :

1- في بولة نحط الدقيق مع الملح و الفلفل الاسود و الزعتر و رشة الشطة و الفلفل الحار و نقلب كويس .
2- في حلة نحط الزبدة و اللبن على نار هادية الحرارة لغاية ما تغلي و نحط عليها خليط الدقيق و نقلب بملعقة خشب لغاية ما تتكون معانا عجينة و نرفعها من على النار .
3- نفصل بياض عن الصفار عن بيضة واحدة .
4- نحط العجينة في بولة او عجان و نقلبها كويس بالملعقة او بالعجان على سرعة هادية و نكسر معاها بيضة كاملة و نقلب كويس لغاية ما يتشرب البيض .
5- نحط الاربع بيضات الباقية على العجينة و نعجن كويس و في الاخر نحط البياض المفصول و نعجن كويس لغاية ما تكون عجينة طرية و سلسة .
6- نحط على العجينة كمية الجبنة البارميزان او الرومي مع الغوريير او الشيدر و نقلب كويس جدا .
7- نحط العجينة في كيس حلواني و نشكلها في صاج على ورقة زبدة سواء كرات متوسطة الحجم او اصابع صغيرة الحجم
8- في طبق صغير نضرب الصفار المتبقي مع ملعقتين اللبن و ندهن بيها كرات الجبنة و نرش في الاخر حبة باميزان مبشورة .
9- نحط الصينية في فرن سخن مسبقا على حرارة 220 درجة لمدة 10 دقايق و بعدين نخفض درجة حرارة الفرن ل150 درجة و نسيبها لمدة 15 دقيقة تقريبا لغاية ما تاخد لون دهبي و تكون الكرات جاهزة للتقديم .