شوربة الطماطم من المطبخ الامريكي

كتر منا ميعرفش انواع للشوربات تكون مختلفة و لذيذة ، تعالوا اعرفوا معنا طريقة عمل شوربة الطماطم من المطبخ الامريكي بخطوات بسيطة جدا و بمكونات متوافرة في كل منزل ....

شوربة الطماطم اللذيذة من المطبخ الامريكي :

المكونات :

7 اكواب طماطم مقشرة و بدون بذر
كوب جزر مبشور
2 كوب شوربة فراخ
كوب الا ربع بصل مبشور
3 ملاعق كبيرة زبدة
3 ملاعق كبيرة دقيق
2 ملعقة صغيرة ملح بحر
ملعقة كبيرة سكر ابيض
كوب لبن
2 ملعقة صغيرة ريحان جاف
1/2 ملعقة صغيرة فلفل اسود ناعم
1/4 ملعقة صغيرة توم بودرة

طريقة شوربة الطماطم من المطبخ الامريكي :

في حلة على نار متوسطة الحرارة نغلي المرقة مع كمية الجزر المبشور و الطماطم المقطعة و البصل المبشور لمدة نص ساعة و نحط معاها السكر و الملح .
في طاسة على نار متوسطة الحرارة ندوب الزبدة و نحط عليها الدقيق و نقلب كويس لغاية ما يسخن و مياخدش لون ، نصب عليه اللبن بالراحة جدا و نقلب بشكل مستمر لغاية ما يدوب الدقيق في اللبن و يتقل قوامه شوية .
نتبل خليط الدقيق و اللبن بالفلفل الاسود و التوم البودرة مع الريحان و نقلب كويس جدا .
نصب خليط اللبن على خليط الطماطم و نسيبها على نار هادية جدا لمدة ساعة تقريبا .
نضرب الخليط في الخلاط الكهربائي او بالبلاندر لغاية ما تكون سايلة تماما ، ثم نسخنها مرة تانية و هتكون الشوربة جاهزة للتقديم .

نصب شوربة الطماطم في اطباق التقديم و نزينها باوراق من البقدونس ..

بالهنا ..