سلطة الكول سلو البسيطة بتتبيلتها اللذيذة

علشان تعملوا سلطة الكول سلو بطريقة بسيطة و سهلة و زي المطاعم ،، اعرفوا معايا طريقة عمل السلطة المفضلة للكل مع تتبيلتها البسيطة و اللذيذة ..

سلطة الكول سلو اللذيذة :

المقادير :

• كمية من الخس المبشور
• كمية من الكرنب الابيض المبشور
• كمية من الكرنب الاحمر المبشور
• كمية من الجزر المبشور 
• 1/2 كوب مايونيز
• 2 ملعقة كبيرة سكر او عسل نحل
• 1 1/2 ملعقة كبيرة عصير ليمون
• ملعقة كبيرة خل ابيض
• 1/2 ملعقة صغيرة فلفل اسود ناعم
• 1/4 ملعقة صغيرة ملح

طريقة عمل سلطة الكول سلو اللذيذة :

1. في بولة كبيرة هنخلط الخس من الكرنب و الكرنب الاحمر و الجزر كويس جدا .
2. في بولة صغيرة غويطة هنحط المايونيز مع السكر او العسل و نقلب كويس ، هنضيف الملح و الفلفل الاسود مع الخل و عصير الليمون و نقلب كويس لغاية ما تمتزج تماما .
3. هنصب كمية من خليط التتبيلة على الخضروات المبشورة و نقلبها كويس و هندخلها التلاجة لغاية وقت التقديم ، و نقدمها باردة ..

بالهنا ..

سلطات

0

التراميسو بالطريقة الاصلية مع البدايل المتاحة

التراميسو من الحلويات الايطالية اللي حبها الكل كبار و صغيرين ، هعرفكم على اسهل طريقة لعمل التراميسو بالطريقة الاصلية و بالبدايل المتوافرة في كل منزل ، تابعوا معايا ..

التراميسو بالطريقة الاصلية :

المقادير :

• كوب كريمة خفق تقيلة للحلويات
• كوب جبنة ماسكربون بحرارة المطبخ او جبنة كريمي 
• 1/3 كوب سكر بودرة
• 2 كوب اسبريسو او نسكافيه مركز
• باكيت بسكويت ليدي فينجرز او بسكويت سادة
• قليل من الفانيليا
• علبة قشطة "اختياري"
• كمية من الكاكاو الحلو

طريقة عمل التراميسو بخطوات بسيطة :

1. في بولة نضرب الكريمة مع السكر البودرة بالمضرب الكهربائي كويس لغاية ما يتقل قوامها .
2. هنحط الجبنة على خليط الكريمة و نضرب تاني كويس مع اضافة القشطة .
3. هنصب الاسبريسو في طبق غويط، نغمس حبات البسكويت سريعا في الاسبريسو و نرصها في طبق بايركس لعمل طبقة .
4. هنفرد طبقة من الكريمة على البسكويت ، و بعدين نكرر طبقة البسكويت المغموس في الاسبريسو و اخيرا نفرد طبقة من الكريمة .
5. هنزين التراميسو بكمية من الكاكاو و نغطيها تماما
6. نحط التراميسو في التلاجة لمدة 4 ساعات على الاقل قبل ما نقديمها ، نقطعها و نقدمها باردة .

بالهنا ..

حلويات

1

النودلز الصيني الشهي

المطبخ الصيني معروف باطباق النودلز ، هعرفكم على ابسط طريقة لعمل النودلز الصيني الشهي بطريقته الاصلية الرائعة ، تابعوا معايا الخطوات :

النودلز الصيني الشهي :

المقادير :

• نص كيلو من النودلز بالبيض
• ملعقة كبيرة زيت سمسم
• 2 ملعقة كبيرة صلصة محار
• 2 ملعقة كبيرة صويا صوص ملح خفيف
• معلب مرقة مفتت
• ملعقة كبيرة ابيض 
• نص ملعقة صغيرة معجون هريسة حار 
• ثمرة فلفل اخضر شرايح
• ثمرة فلفل رومي احمر شرايح
• ثمرة جزر صغيرة شرايح رفيعة
• 2 ملعقة كبيرة زنجبيل مفروم
• فص ثوم مقطع
• ثمرة بصل كبيرة شرايح
• ملعقة كبيرة زيت نباتي 

طريقة النودلز الصيني الشهي :

1. نغلي كمية مياه في حلة ، نسلق فيها كمية النودلز لمدة 3 دقايق او لغاية ما تستوي و نصفيها كويس .
2. في طاسة بقاعدة سميكة و تيفال نسحن الزيت و نشوح فيه شرايح البصل و قطع التوم مع الزنجبيل و الجزر و نقلب كويس .
3. نحط الفلفل الرومي و نقلب لمدة دقيقتين بس ، هنصب الخل و نقلب كويس جدا لغاية ما المكونات تتشرب السائل .
4. هنحط الهريسة مع مكعب المرقة و الصويا صوص و صوص المحار مع زيت المحار في الطاسة و نقلب ، و بعدين نرفع الطاسة من على النار .
5. نحط النزدلز المسلوقة على الخضروات و نرفعها على النار تسخن المكونات ، و هتكون الاكلة جاهزة للتقديم .

بالهنا ..

وصفات

0

الفتوش من المطبخ التركي الشهي

المطبخ التركي غني بالاطباق اللذيذة ، هنقدملكم الفتوش من المطبخ التركي بطريقة بسيطة جدا ، تابعوا معايا التفاصيل ..

الفتوش من المطبخ التركي :

المقادير :

• 3 ثمرات بصل اخضر
• ثمرة فلفل رومي اصفر
• ثمرة فلفل رمي احمر
• ثمرة خس صغيرة
• 3 ثمرات طماطم كبيرة 
• فص توم مهروس
• حزمة فجل احمر
• 3 ملاعق كبيرة بقدونس مفروم
• 4 ملاعق كبيرة نعناع مفروم
• كمية عيش محمص
• نص ملعقة صغيرة خل ابيض
• رشة ملح
• رشة فلفل اسود
• رشة زعتر جاف
• ملعقة كبيرة زيت زيتون
• عصير ليمونة

طريقة الفتوش من المطبخ التركي :

1. اول حاجة نغسل كل الخضروات كويس جدا ، و بعدين نقطعها سواء مكعبات او شرايح او حلقات حسب ذوقنا .
2. في بولة كبيرة نخلط الخضروات المقطعة مع العيش المحمص .
3. في بولة صغيرة نخلط عصير الليمون مع الخل و الملح و الفلفل الاسود و الزعتر و زيت الزيتون مع اضافة التوم كويس .
4. نصب التتبيلة على الخضروات و نقلب كويس و نسيبها في النلاجة نص ساعة تتشرب من طعم التتبيلة .
5. نقدم الفتوش جنب كل انواع الاطباق الرئيسية .

بالهنا و الشفا ..

سلطات

0

مشروب الفول السوداني باللبن اللذيذ

علشان نعمل مشروب الفول السوداني باللبن في البيت بسهولة و بمكونات مضمونة ، اعرفوا معايا الطريقة بتفاصليها علشان تقدموا مشروبات باردة و مختلفة تقلل من الاحساس بالحر ..

مشروب الفول السوداني باللبن اللذيذ :

المقادير :

• نص كوب زبدة فول سوداني
• نص كوب لبن كامل الدسم
• عسل ابيض "اختياري"
• 4 مكعبات تلج

طريقة مشروب الفول السوداني باللبن :

1. في الخلاط نضرب كمية زبدة الفول السوداني مع اللبن و العسل كويس جيدا .
2. نحط مكعبات التلج في الخلاط و نضرب شوية لغاية ما التلج يتجرش
3. هنصب المشروب في كوبايات للتقديم ، و نزينها برشة من الكاكاو او الكريمة المخفوقة ، ونقدمه فورا .

حضروا مشروب الفول السوداني في البيت و استمتعوا بالذ مشروبات من صنع ايديكم ، بالهنا ..

مشروبات

0